Mam htu shoiwa ai nsen hte Ulat hpunggam goi ai nsen ni chyawm gaw, dai Sinpraw maga de nna gumtawng pru wa ra ai ninghkaw ajan, u numji ni shaga ai nsen, ni hte galai htoi, ngoi nga sai. Si mani ai jahpawt manap na jan shingkang gaw, Sinna Dingda maga na mangai machya ntsa tsap nga ai Ahkawn a myiman hpe wa ze rai hkra let, numripan hkyeng nsam madun; di kai na matu tsun; nga sai. Ahkawn nga ai mangai yi gaw Ala ni a nta kaw nna nlung gabai dep daram sha tsan ai rai nna, machya ntsa tsap nga ai Ahkawn hpe adan sha mu lu nga ai. Gade n na ai aten hta:
“Hey! Ning Bawk” --- nga Ahkawn shaga dat ai nsen na dat ai hte
Kanau Bawk:
“Oi...oi...”! nga htan dat let lawan ladan gat pru wa u ai. “Grai tsawm hkra wa, gadai wa rai wa sai kun she ngu sa”!
Ahkawn:
“Dai daram’aw n rai ra na shadu’ai. Ning Bawk, ya ngai mam mu ga sa na ngu ai le. Nanhte hpe n saw da ma ai i --- sa, sa ga le”?
Kanau Bawk:
“Saw gaw saw da ma ai. Raitim, daini’aw hting’aw (htinggaw) masum ga saw ai rai nna masha ngau n gu na tai nga ai; hpu Doi’ung mani sha naw jawng kawn (kaww nna) du wa ai re majaw, daini sha’aw naw hkring sa la shangun mayu ga ai. Nu ngai’e (ngai hpe), Ni Tawng Nmawn ni a yi de sa na hku tsun da ai. Ngai’aw shanhte a yi de sa ra na re”.
Ahkawn:
“Shing’ga jang’ung (shingnga jang mung) daini ngai manang n lu sai i”!
Kanau Bawk:
“Manang’aw she lu na rai nga ai le e”.
Ahkawn:
“Raiti’ung (raitimung) law, nanhte she grau hkau ai rai nna myit htep ngu ai re wa! Yaw, taw naw sa wa sai. Bye”!
Ala:
“Kanau e, masha ngau n gu yang’aw hpu Doi’ung sa na; anhte mam dan ngut tim makyin jinghku ni hpe naw garum la ga. Gade’ (gade a ) yi de sa ra na rai”?
Kanau Bawk:
“Hpu Doi, gade’ yi de’ung (gade a yi de mung) n sa ra sai. Daini sha’aw naw hkringsa la u. Jawng kaw nga ai ten, masha ni’ (ni a) nta e n hkring n sa bungli galaw ai wa: grai ba na re, naw sa la u”.
Ala:
“Kanau, nanhte grai myit su nga mit’ai (mitdai); rai u ga. Mana’ung mana tup sa la let grai pyaw sai re; hpu Doi n ba sai. Gade’ yi de sa ra na rai”?
Kanau Bawk:
“Hpu Doi sa mayu’ang’ung (sa mayu jang mung), Tsa Bawk Kawngdu ni a yi de sa su. Ning Hkawn’ung manang n lu ai nga, shi hkrai sa wa sai. Sana rai’ang’aw (rai yang gaw) lawan sa wa ra sana re --- manang ni jau jau sa wa masai; pi naw hpanghkrat nga sai. Ngai’ung naw sa wa sai yaw, bye”!
Ala gaw shawoi na hta grau zet ai hku nhkyi, jahpang ret rai mangai yinwa de man mu (dan) ga sa wa sai.
Saw tawnda ai ga masha nkaumi mung du nga magang masai. Ngwipyaw simsa la ai mangai yinwa kaw du nga sai Ala gaw, htoihkrat ntsa kaw lung dung dat let, tsittsawm pyawngawn ai Wunpawng Mungdan hpe kraw sindai hkra la ai hku mada jahproi yu taw nga yang, hkrudu shingtai zawn dung nga ai Ahkawn gaw Ala hpe mu dat ai hte rau, kabu gara gumtawng yu wa let:
“Ala nang hkrai sha wa, gadai hpe sumru taw nga n ta? Nau’aw hkum sumru yaw, jawng hpaw jang bai hkrum na she re’aw” --- ngu Ahkawn gaya gaya, mani sai di shala dat u ai.
Ala:
“Gadai hpe sumru taw nga ai’ung (nga ai mung) n re. Ngai le, ndai manu dan nhprang rai myu hkum; dusat dumyeng yawng mung ahkum alum; nam u amyu hkum sumhpa a shanu shara; namshu namshan hkum sumhpa; namsi namsaw hkai n ra; nampu nampan she hpra; katsi bungli bungsha chyai; yawn pilan she gashai; re ai anhte’ (anhte a) Wunpawng Mungdan hpe sung sung myit yu nna, lam mi hku’aw ndai zawn re ai mangai ta a namchyim namta; n wai sama; hkam sha ai’ung gaw kaja sai. Raitim’ung, tsihkrung tsinan, tu matu, hkrung mahkrung yawng a sumsing mungdan hpe wa, anhte a gatset kan bau lam langai a majaw sha jahten shaza, shama, shamyit kau ai lam hpe myit sawn hkrup nna sha gaw e”.
Ahkawn:
“Ga! Ahkawn htak ai hte Ala myit-sawn ai lam’aw grai shai nga a hka i! Ala’aw ningbaw ningla kaja tai na re’ (re ai) majaw, naw kaji nga ai ten kawn (kaw nna) Wunpawng amyu hte Mungdan a matu myit taw nga sai hpe Ahkawn grai arawng la nngai yaw”.
Ala:
“Daihku tsun n-gun jaw ai majaw grai chyeju dum ai yaw Arat”.
Ahkawn gaw, Ala dung nga ai htoihkrat n’gam (ninggam) langai lung dat let: “Ala namsi sha ga” nga sep lang da ai shi a lata na lwihkri si jaw sha u ai. Ala gaw Lwihkrwi si n ra ai wa rai nga ai. Raitim, shi hpe tau ai majaw sha ya nga ai.
Shing rai nga yang, saw da ai ga masha ni du hkum sai hte maren, mu bungli galaw na matu yiyang de rawt sa wa masai. Shani tup, u di di ten na nam u marun yan zawn rau sha bungli galaw nga ai hpe grup-yin gaw n-gun lu mau kabu nga ma ai.
Ahkawn:
“Ala, an lahkawng yingam loimi hpanghkrat wa nga ga ai: lawan galaw dat ga” nga tsun let Ala a yingam du hkra Ahkawn galaw kau ya nu ai.
Kani Tawng:
“La e.., nan Ahkawn chyam me’aw, mu hkrum ai grai pi n na shi ai ten kaw nna grai tsawra myit tau hkat chye nga myitdai i..., ya La nang’aw hpaji chye wa, shabrang’ung (shabrang mung) rai sai. Dai majaw, Ahkawn’ung La hpe sha la nga ai da...i... Ahkawn.... n rai i taw”? Hi...hi...hi. Kani Tawng gaw hpyen magam kawn hkringsa rai nna, myit su kaja, dinghku num mi arai hkra raitim tinang a jinghku kasha ni hpe gaw grai sala ja ai jan rai nga lu ai.
Ala:
“Rai u ga law, Ni Tawng e. Dai daram’aw n malang ra na re...ndan pala le”.
Ahkawn:
“Re lu... Ala i...nga she mayu sa”! Hae...hae..hae.
Kani Tawng:
“La..., La le Ahkawn hte rau nga yang anhte ni yawng mung grai myitdik kabu lawm na re hta sha n ga, nan a shawmglam mung grai ngwipyaw na re. Rau nga lu hkra anhte yawng jawm shakut garum na --- hkum tsang yaw”.
Ala:
“Bai rai sai. Nau shala nga ai yaw... Ouch! Sei..sei..sei”.
Ahkawn:
“Hpa’aw byin wa sata! Ala”?
Ala:
“Hpa n byin ai, Ahkawn”.
Ahkawn:
“Lata wa she gadoi kau sai gaw! Chyuk..chyuk..chyuk”.
Ala:
“Kaji mi sha re, hpa n tsang ra ai yaw, Ahkawn”.
Ahkawn gaw shi a palawng lata daw mi gang je la nna Ala a lata na nma hpe gayawp ya nga lu ai.
Ala:
“Atsang arang wa rai’na me’aw (wa rai nna me gaw). Ya palawng kaja she gang je kau sai’aw (sai gaw).
Kani Tawng:
“Dai yu’ (dai yu u)! La nang hpe Ahkawn grai tsawra ai ngu Ni Tawng tsun ai shut ai i”? Kani Tawng myi n-gyeng praw let shala nga lu ai.
Ala:
“Tsawra nna’aw n rai na re law...myit su nna rai nga ai..., nau wa’aw hkum sha-ang la taw yu’, Ni Tawng”.
Kani Tawng:
“Myit su nna matsan chye dum ai masha’aw ndai ginding ntsa hta grai taw ai re. Tsawra myit amyu mi lu la na’aw yawng a matu loi nga ai. Raitim’ung, myit su myit gawp let tsawra matsan dum chye ai myit hpe lu la na gaw yawng hta mai byin nga ai n rai. Dai majaw, Ni Tawng galoi’ng (galoi mung) tsun tsun re ai: matsan dum ai myit gaw tsawra myit hta nna grau nga ai ngu ai ga gaw n shut nga ai”.
Ala:
“Ni Tawng, ya na zawn tsun sharin la ai lam hpe chyeju dum nngai yaw”.
Si mani ai katsi bungli bung ahpawt wa; Tsan Sinna Dingda maga; Ugam ngoi parawn; samwi nsam myu hkum hkrawn; Shingkri U gatsau; Shannga, Tsap, Wadu, Chyahkyi, jahtau; nsen ni gaw dai shani na mu galaw ai lam hpe jahkring na matu shaga nga masai. Lamu htumpang de shang wa nga ai Ninghkaw Ajan chyawm gaw nip sani rai ’dawng mi ’ram (lata ladawng mi daram ) sha htoi htoi rai nga sai aten, Ahkawn hte Ala mangai yi kaw nna dum nta de htang wa masai. Mare du shang wa ai hte rau, Ahkawn gaw shi a hpyennum manang ni hpe n myit mada ai sha hkrum, ga dup (gadup) lu ai rai nna n dang tsun hkra kabu nga lu ai hte Ahkawn gaw, shi a share shagan myitrum manang ni hpe Ala hte shakyen ya nga ai.
