Laban bat mi na ai hpang:

Kani Ba:
“Ahkawn, loi zim taw nga ai ngu yang, La sa chyai nga nna she rai nga a hka! La.., Ahkawn hte nan lahkawng hpe Ni Ba n-gun grai yu lu nngai”.

Ala:
“Tinang Kahkri ni hpe, nau wa’aw n shakawn ga le i.., garai pi n re ai ten kaw nna”!

Ahkawn:
“Re lu. Shakawn yang latsawn ai da”!

Kani Ba:
“Latsawn yang she Ala a matu grau kaja na rai nga ai le. Raitim’ung, ya’aw garai hkum latsawn dat mu re lu.., ya hkring Ni Ba gaya mat na”. He..he..he.

Ala:
“Ni Ba mung nau chye shala ai law, grai gaya wa sai”. Gade n na yang Ala gaw nta de ginhtang mat wa sai.

Kani Ba:
“Ahkawn, nang hpe Abai ga kaja tsun dan yu de. Nang, La hte n lu nga yang chyawm’aw na’ (na a) prat hta grai sum sai. Shanhte nau ni yawng hta na myit su dik, tsawm dik ai hte shabung nna laika hpaji mung grai ram ai rai lu ai. Yawng’aw shi hpe shakawn ai hkrai rai ma ai. Dai hta sha n ga, shi’aw asak 13 ning hta tsang 10 awng ai rai n htawm, ndai Northern Division hta No.1 asak kaji dik tsang 10 awng ai record hta mung shi tsaw dik re nga N-gu tsun dan ai”.

Ahkawn:
“Ashawng, shi le asak grai naw kaji ai i”!

Kani Ba:
“Asak kaji tim’ (timung) hpaji chye ai myit su kasha re’ majaw, lam shagu n dut n dang chye sawn, chye galaw ai rai lu ai. Kanu yan Kawa mung shi hpe grau tsawra nga malu ai. Shi’aw, bawnu, nyan, htauli htaula grau kaja ai rai nna, makyin jinghku ni hte Kanu yan Kawa sharin ya ai lam ni hpe mahkra matsing hta la chye ai majaw myit su ai she re’aw. Kawa’ung kasha ni a matu nga, arawng aya hpe tawn kau da nna, shi nan jawng sara galaw rai, n yup n sha shakut nga ai rai lu ai. Anhte yawng mung kasi la nga ga ai. La’aw Chyum laika maumwi ni mung yawng ngu na daram, n yu ai sha mying, shara hte hkrak hkrak chye hkai tsun ai rai lu ai”.

Ahkawn:
“Shingnga’ang’ung (shingnga jang mung), Ashawng.., Ahkawn hte’aw shi n gringdan na re’ i? Ahkawn’aw hpaji mung n chye, gawng shing-yan mung n tsawm, grau nna’aw, Ahkawn’aw mungdan magam ang ai de htawt sit hkawm ra re ai lam ni law law myit sawn hkrup nngai. Garahku prat tup rau nga lu na lam hpe tsun dan yu rit, Abai (Ashawng)”.

Kani Ba:
“Ahkawn e.., hpa hkumtsang yaw. Tsawra myit ngu ai gaw n kaja ai lam ni hpe pi kaja ai hku myit sawn sharai la lu ai atsam nga ai. Tsawra myit hta tsawm ai, n tsawm ai; kaja ai n kaja ai; masu magaw, hkalem hkalau, manawn masham lam hte n ju n dawng ai lam ni n lawm nga ai. Ahkawn she, Ala a tsawra myit lu hkra matut shakut u”.

Ahkawn:
“Manaw manang, makau grup-yin gaw mau na ma ai. An lahkawng grai tsawra hkat ga ai, Abai. Shi mung Ahkawn hpe tsawra ai lam tsun dan ai. Raitim’ung, Abai..., ngai le, shi kau tawnda na hpe grai tsang n ngai”.

Shi mung Ahkawn hpe Tsawra ai lam Tsun dan ai.

Kani Ba:
“O..! Ngai’aw dai daram pi ’rai (garai) n shadu ai. Abai grai na kabu lawm sai. Tsawra sai re’ majaw, kau tawnda na lam ni hpe n myit sawn ra na sai. Hkum tsang yaw, anhte ni yawng mung garum ya na, Ahkawn”.

Ahkawn:
“Abai.., ya Ala’aw naw kaji nga ai hte hpaji naw matut sharin ra ai re majaw shi myit n pyaw na lam ni hpe anhte n mai galaw na re. Shi sharin la nga ai laika hpaji ni hta mung dingbai dingna n byin hkra nanhte nu, wa myit su ni galoi mung shadum la nga marit. Gawngmawn kasi kaja madun mayu ga ai”.

Kani Ba:
“She rai law. Ahkawn mung shi a ntsa dai daram chye myit ya ai majaw Abai mau kabu mat sai...”.