Ahkawn:
“Ala grai ba na re.., nang hpajet n lawm’ i (n lawm ai i)”?
Ala:
“Lawm ai.., Ahkawn”.
Ahkawn:
“Ahkawn hpang la dat yu’ ( la dat yu u)”.
Ala:
“Maw..yaw”! nga Ala mani shala let, hkashi kaw du taw nga ai Ahkawn hpang gabai ya dat u ai.
Ahkawn:
“Ala, Ahkawn hpang ’hkrimg mi (jahkring mi) yu wa rit”, nga tsun shaga nna Ala shi hpang du jang, hpajet hta hka madit la nna Ala a salat gatsut ya nga ai hte santsawm ntsin jaw wu ai.
Goi...! Tsan la ai sumtsan hkrunlam hta hkriba nna lwi hkrat ai salu salat ni gaw Ahkawn langai a majaw hkoi mat wa lu sai, Ahkawn! Ala hte Ahkawn hkrai hkrunlam rau hkawm let, tsaw ai lam tsun jahta chyai n law ai aten, Lakawng Bum Lagaw na Lam nbraw du wa magang sai hte maren, Ugum Jan mung Marau tu ai Bumlang Bum marun lapran hku, gyigaw sumla soi nga ai samwi ni a lapran hku shang wa nga sai. Ala garahku di na taw!
Ahkawn:
“Ala.., Ahkawn le Ala hte ndai zawn hkringmi sha pi hkabra na hpe myit n lu nngai, raitim, Ala a naw matut sharin la ra ai mungkan hpaji a majaw sha hkringmi.......hk...a...hka.....br....a....bra....r....a.....ra ai r....re.... ng....ng....ngu..u...u..u chye...chye..na...ya...ya..ya... n...n...ngai yaw”.
Ala:
“Hkum hkrap u yaw, Ahkawn. Ahkawn hkrap ai myiprwi si ni mahkra Ala a sinkraw kata hkra la ai nma katsing de du shang wa nga ai; Ahkawn hkrap jang Ala grau n chye nga mat ni ai; hkum hkrap nu yaw Ahkawn. An ’hkawng gade ’ram (an lahkawng gade daram) tsawra ai ngu ai hpe, an ’hkawng sha chye ga ai; yana zawn ’hkringmi hkabra ai hpe grai myit n mai garen ai yaw; gade n na’ang (n na yang) bai hkrum na re. Ala mung hpangna Laban shani Ahkawn hpang lung wa na; hkum hkrap sa Ahkawn”; ngu tsun let shi lang da ai hpajet hte Ahkawn a myiprwisi (myiprwi-si) ni hpe gatsut ya nga ai. “Ndai hpajet mung Ahkawn la mat wa u; raitim, yana zawn myiprwi gatsut na matu n rai; hkriba nna pru ai salat ni hpe gatsut kau nna bansa lu na matu she re”.
Ahkawn:
“Ala, Ala hkrai sha hkawm mat wa ai raitim, Ala a hpang, makau kaw Ahkawn hte rau rai nga ai ngu Ala sawn la u yaw; hkumsha tsan-gang nga ai raitim, myit masin stawra myit’aw ten shagu rau rai nga ga i; n’sin (ningsin) mung sin wa sai le Ala”.
Ahkawn hte Ala, Lakawng Bum Lagaw na lam nbraw langai hpra hpra gabye nna, n ja n hpra myirpisi ni hte shingdu gayin yawng mat wa masai. Ala langai mi hkrai sha, n’rim (ningrim) rim ai hkrumlam hta, mungkan ntsa n chye tsun mat hkra hkamsha yak let, laiwa sai tenna lam ni hpe sawn dum lu; n gut n gu; n ra myiprwi hkrat pru; wa sai gaw Ahkawn nang chye ya na n rai sai i..!
Ala langai mi, jawng kaw du nga ai manga ya na sai. Ahkawn hte hkrum lu na n’dat (ningdat) da sai, dai Laban shani hpe sha la nga ai, lanade mi na jawng yu ai aten hta:
Zai tsan:
“E..Hkau! Ala nga ai nang n rai”? Zai Tsan gaw, Nraw Kawng Mare e nga ai Du Kaba Sai La Raw a kasha alat rai nna, N-gum La Mare na No.2 Lahta Tsang Jawng e Hpaji sharin nga ai shadang’sha rai nga ai. Weekend du shagu shanhte’ (shanhte a) Nraw Kawng Nta de lung wa wa re ai rai nga ai.
Ala:
“Re. Hpa’aw tsun mayu n ta”?
Zai Tsan:
“Nu Ba Ahkawn hte manihpawt Hpyendap kaw hkrum DA nngai; Hkau, nang hpe grai dum ai lam shakram
ya yaw nga htet kau DA ai. Ndai’aw shi ka DA ai laika re”. Ala a na hta DA ngu ai gahkum hpe, masum lang na gahtap dat ai hte rau salum kahpra mat sai rai nna, Zai Tsan hte shaga nga ai kawn, kalangta: “Hkau, yahkring she atsawm bai hkrum chyai ga yaw, grai chyeju kaba sai” ngu tsun kau da nhtawm shi a jawng na hostel de wa mat nu ai. Laika sumbu ntsa e Ahkawn a lata maka! Ala n chye hkrung mat na daram gahpra nga sai n rai ni! Ala gaw yupku ntsa dung; shi’ lagaw hpe ga gaw jahkrat da; baw gum rai let laika hpe yatsha hpaw nna hti dat yu yang:
| “Ahkawn Tsawra dik ai Ala,
|
 |
|
|
Ahkawn laika kadun mi ka da nngai. Ahkawn hte Ala raurun pyaw chyai let, tsaw madin kumpa
waw; tsaw ai lam ni tsun jahta chyai n law; hka bra na hpe n myit mada; nga ai ten, an lahkawng grau
tsan-gang mat ra sai hpe Ahkawn myit n dik nngai. Ahkawn, Ala hpe gadewa mi n ja
nhpra, ndai zawn byin ai lam hpe myit n dik ai raitim, Mungdan Magam htawt sit ra mat sai
majaw, Ahkawn garahku n chye nga mat ni ai. An lahkawng gade daram tsawra ai ngu ai
gaw, an lahkawng daram tsawmhtap bung pre ai hku chye hpan tawnda ai Madu Karai Wa sha chye na
sai. Gadai hpe mara shagun mung n mai; Ahkawn ganingdi na ta! Shabai n mai sai an a rau run pyaw chyai ten ni hpe Ahkawn myit dum
shagu; Ahkawn a kraw hta Ala hpe chyu dum lu; marit myiprwi pru; nngai le Ala. Ahkawn a prat gammaka
(kammaka) hpe Ala chye na ya rit yaw. Ala hpaji chye jang Ahkawn myit dik
sai. Bai hkrum lu na hpe sha myit mada let, sumtsan hkawm mat wa ra sai
majaw, Ahkawn grai Tsawra Myit shang ai Ala hpe Ahkawn Myiprwi hte shakram da nngai yaw.
|
|
|
|
|
|
|
|
|
|
Ala Tsawra Dik ai Ahkawn
Lakawng Bum
August 17, 1987”.
|
|
 |
|
Goi....! Yupmang kun! Shingran mahtang kun! Kajawa byin ai rai sai kun! Ala n chye ginghka mat hkra nga yak mat sai. Ala n kam sha ai Lwihkri Si a majaw kun! Ala hte Ahkawn hkawm bra mat wa sai Lakawng Bum lagaw na lam’she (lam lamshe/numshe) kasha a majaw kun! Ahkawn gatsut ya ai hkriba salu salat gaw, daini myiprwi hte, Ahkawn hta lai nna gadaiwa gatsut jahkoi ya na taw ...Ahkawn! Lakawng Bum Lagaw hta hkrat ai myiprwi dai; ten ladaw gade lai lai; Ala hpang du gawai; Sinkraw kata hkrat gaprep nga ai le... Ahkawn. N chye ginghka mat ni ai. Ahkawn nang Ala hkamsha ai lam ni hpe chye ya yang Ala gadesha pyaw lu na! An a n’dat da ai Laban mung du sai le..! Ya daini nang ganang dam mat wa nit ta!
