Laban Kruya jahpawt:
Kani Ba:
“La..! Nga nga n dai i”?
Ala:
“Nga ai law..! Ni Ba e. Hpa’aw (hpa baw) tsun mayu ai kun”?
Kani Ba:
“Hpa’aw ahkyak nna’aw n re. Nang mung hpawtni jawng de bai sa wa na re’ majaw, Ni Ba ni hte shat ma mi jawm sha ga ngu nna sha gaw e”.
Kanu:
“Sa su.., sa su. Ga madat ai baw re. N’ni Ba nang hpe ainawn nna rai nga ai. Hkannang su”.
Katsa Ba:
“Hkri La nang hpawtni jawng de bai sa wa na nga ai re’aw i”?
Ala:
“Re’ (re ai), Tsa Ba. Kadun la ai jawng dat ten’aw htum mat sai. Anhte a buga mare kahtawng na jinghku jing-yu hte manaw manang ni yawng hpe pi n lu hkum kau da sai”.
Kani Ba:
“Nau she rai gaw e. Grau nna’aw manaw manang n’nan ni hte n kam hka ai lam rai na re”, ngu tsun let Ahkawn hpang myi n-gyeng mada dat wu ai.
Ala:
“Ni Ba’aw grai chye shala ai she re’aw”.
Tsa Ba:
“Laika grai shakut u lu yaw, La. Anhte buga na nang hpe sha yawng grai myit mada tawn ai re. N’wa a ga ni hpe mung adum nga u. Ngai kaba sai wa pi’aw, N’wa kaw hpaji sa hpyi hpyi re ai re. Nang mungkan madang dep ai hpaji ni hpe chye la jang N’nu yan N’wa a myiman pa na re. Dai hta kaga, anhte buga masha ni yawng kabu, arawng lu na re’ hta sha n-ga, duna ra ai tinang a shawnglam shanan nan rai nga ai. Ya maigan mungdan ni de laika hpaji sharin na matu, Mungdan Shanglawt Asuya’aw lam waw da sai. Gade n na’ang masha lata wa na ma ai. Dai shaloi mung nang lu lawm hkra di u. Tinang a mungdan kata sharin la ai hpaji gaw, tinang ginra, tinang gaiwang kaw sha mai jai ai re. Maigan mungdan hkan Wunpawng ’myu’sha (amyumasha) yawng a gawng malai tai let, maigan mungdan, mung’sha ni (mungdan masha ni) hte shingjawng sa wa na hpaji’aw, maigan na sharin la ra ai hpe Hkri La nang galoi mung dum nga u. Ya, tinang Shanglawt Hpung hpe woi awn nga ai Ningbaw ningla ni gaw asak mung grai kaba wa masai. Shanhte ni a lahpa galai na’aw na a lit, nanhte prat ram ai ramma, shayi shadang sha ni a lit nan rai sai hpe mung Hkri La adum nga u. Masha ngu ai’aw, tinang dung ai kaw chyusha azi yu ai baw n re; tsan tsan de mung yu, mu ra ai. Nang Maigan Mungdan ni hkan lama du hkawm sa wa ai raitim, tinang buga hpe hkum malap kau yaw. Tinang a shara hta, tinang a ’myu’sha ni garahku jamjau hkrum, ruyak, zingri zingrat hkrum, mahkyit mahkut tam sha let, htingga, nbat jinghpa tu she kyet; bumlang, hkaraw nhkap garet; kashu kasha bau lakawn; Rawt Malan lam-yan hpe mung sawn; rai asak hkrung nga ai lam hpe Hkri la dum dat jang laika shakut, shing’an (shinggan) hpaji ni hpe aten n lahpawt kau ai sha grau grau shakut, hkaja mayu wa na re”.
Ala:
“Rai nga ai. Ndai zawn Tsa Ba hpaji jaw, n-gun jaw la ai lam ni gaw nye’ (nye a) matu sha n rai prat ram ai anhte Wunpawng shayi shadangsha ni yawng hta grai akyak nga ai. Tsa Ba nang aten rau yang, ndai mare buga na ramma ni hpe mung ndai zawn hpaji jaw la yang grai kaja na re”.
Katsa Ba:
“Ndai hkan prang ayai hkawm nga ai ramma ni hpe’aw’ Tsa Ba tsun dan tim akyu rawng ai lam nau n nga ai. Hpa majaw nga yang, shanhte manu n chye shadan la ma ai. Dai hta kaga, laika hpaji, machye machyang ni hpe mung n kam hkaja, tinang ’myu’sha shada da jahpoi asawng hkat; mare kaba de 1-2 ning sa nga malu yu nna gaw Myen ga jabyak loili chye shaga masu jang, dai ga hpe hpaji byeng-ya kaba shadu; tinang a manu hpe pi tinang n chye sawn; grai bai chye dum mat; tinang ga hte htunghkring hpe n krem dum re ai lam ni amyu myu a majaw, dai zawn rai nna Myen wa a shingni ga-up wa nga ai, lagaw lata tai ya nga ai Wunpawng shayi, shadang, ramma ni hpe Tsa Ba galoi mung myit sawn hkrup ai raitim, shadum jahprang mung n mai; shadum jahprang ai wa hpe mahtang anya shadu, chye dum, rai dum nna tsun ai shadu; rai nna Tsa Ba nau n kam tsun ai. Nanhte myit su kasha ni madat la nna akyu chye jashawn ai, manu chye shadan ai ramma ni hpe chyawm’aw Tsa Ba mung chye ai made sha’aw tsun dan mayu nngai”.
Kani Ba:
“Shat naw bang sha u. Shalap hte Nga ga-i mung naw ngam nga ai. Bainam shan mung naw bang sha ga. Ni Ba’aw nan nau ni amasan rai kaba wa, hpaji chye wa re ai hpe yu n-gun lu nngai. Nan nau ni yawng hkum jang mare buga mung alum nga ai. Ni Ba ni hpang mung aten lu jang laika ka wa rit yaw.”. Ni Ba ni gaw Ala ni a dingbu mung rai nga ma ai. Tsun jahta nga let lusha sha ngut masai.
Dai shana de:
Ahkawn:
“Ning Bawk”.
Kanau Bawk:
“Oi..! Sa wa rit. Miyet pi nang sa wa na kun ngu Gyinshau Si shari mi tawnda ya ai re wa.., naw nga ai kun! Jahkring mi yaw”. Kanau Bawk Hkawn Fridge de gan gagat (lagat) yin rai mat wa nga ai.
Ahkawn:
“N ra ai gaw e, Ning Bawk.., ngai kaga mi n shang dung sana re. Chyeju kaba sai yaw. Gyinshau si ndai grai dwi ai”. Gyinshau shari magret sha let Ahkawn: “Ning Bawk, na’ (na a) Hpu Doi hpe daina de Ja Seng Pan ni a nta kaw sa wa na matu Ahkawn sa htet da ai ngu tsun ya rit yaw”.
Kanau Bawk:
“Mai ai le.., hpa’aw (hpa baw) sha wa mi galaw woi na ngu myitta (myit da), hpu Doi’aw mare pi nau n chye lam ai re wa. E! Tsun ya na yaw”.
Ahkawn:
“Hpa ahkyak nna chyawm gaw n re. Hpawtni shi jawng de bai sa wa na re’ majaw Tea Party saw ai sha gaw e; hkum malap kau ya rit yaw.., alu sha lu..”.
Kanau Bawk:
“E law.., tsun ya na. Raitim, nye’ hpu hpe n kaja ai lusha’aw hkum jaw ya me re lu. Anhte shi hpe grai tsawra ai re”.
Ahkawn:
“Hkum tsang yaw, Ning Hkawn nga ai. Masha ni gunglau wa jang pi ngai tsun na”. Ahkawn gaw tsun jahta nga let Kanau Bawk a man e ga langai mi tat dat nu ai.
Kanau Bawk:
“Shinga’ang’ung (shingnga jang mung) nye’ Hpu Doi hpe atsawm woiya rit yaw, nye’ kaning”; ngu shala dat nu ai.
Ahkawn:
“Nau gaw hkum rai mayu le.., tinang kahpu ni hte n sha ai baw re”.
Kanau Bawk:
“Chye nga ai...chye nga ai..., hi..hi..hi”.
Ahkawn:
“Yaw! Naw wa sai ”. Bye!
Ala gaw Kahpu Ba Awng Hkam hte Chess gasup nga ai ten:
Ja Seng Pan:
“Ning Bawk..!”
Kanau Bawk:
“Oh! Hpu Doi.., nang hpe ning Hkawn, Ja Seng Pan ni’ nta de sa wa na hku htet da ai re wa! Ya, Ja Seng Pan pi bai sa shaga taw nga sai.., ngai gan malap kau nga ai.., Sorry yaw.., Hpu Doi”.
Ala:
“N ra ai gaw e, kanau; graiwa ahkyak nna’aw n rai nhten”!
Kahpu Awng Hkam:
“Hpa’aw sa galaw na da i, n’sin’ me (ningsin e me)”?
Ala:
“N chye ai, Ba Awng”.
Kanau Bawk:
“Le.., Ja Seng Pan ni’ nta kaw Tea Party sa lawm na matu miyet ning Hkawn sa tsun da ai rewa ngai gan malap kau ya nga ai”.
Kahpu Ba Awng Hkam:
“Ke. Masha ni chyawm gaw i! Sa yu su le, mishe shaga yang’aw. Raitim’ung, n’sin grai gaw hkum sin nga yaw”.
Ala:
“Mai sa, Ba Awng. Yaw.., naw sa wa sai.., wa nna she bai matut gasup ga”. Ala gaw, Ja Seng Pan ni a nta de Party sa mat wa sai.
Ahkawn:
“Sa wa rit..., sa wa rit Ala. Ala grai na mat ai --- kyin nga ai re i”?
Ala:
“Kyin nna’aw n re; Kanau Bawk tsun dan na gan malap kau nna da. Ngai’aw hpu Awng hte Chess gasup taw nga ai sha gaw e”.
Ahkawn:
“Hpa n ra ai yaw, Ala hpe Ahkawn shaga chyai mayu nna she re”.
Ala:
“E law. Yana zawn Ahkawn hte hkrum zup lu ai majaw Ala langai kabu nngai”.
Ahkawn:
“Ala hte rau run pyaw chyai ten ni n law la ai shaloi, bai tsan-gang mat wa ra ai lam hpe Ahkawn a myit kraw hta, lam mi hku’aw Ala hpaji chye wa na re’ majaw kabu nngai; raitim’, lam mi hku chyawm’aw Ala hte hka bra wa ra ai majaw, Ahkawn n chye nga mat ni ai”.
Ala:
“Ahkawn.., Ala mung Ahkawn hkamsha ai hta grau nga sai re. Ala a prat hta Ahkawn n lawm yang salum n rawng ai sumla shamu hkawm ai zawn ngu nngai. Dai re’ majaw, masum ya shani hkan she sa wa na ngu Ala myit dawdan da sai”.
Ahkawn:
“Shing’a jang mung Ahkawn grai kabu sai; raitim Ahkawn a majaw Ala a hpaji hkrunlam hta dingbai dingna gaw n jaw shangun mayu nngai, Ala. Hpangna Laban shani’aw Ahkawn mung, Ahkawn nga ai Lakawng Bum lagaw de bai ginhtang (n’htang) lung wa ra sai”.
Ala:
“Shing’a’ang (shingnga jang), Ala mung hpangna Laban shani she sa wa na re; lam daw mi jawm hkawm ga i”?
Ahkawn:
“Ahkawn, Ala hpe tsawra ai majaw, Ala a laika hpang hkrat wa nga ai. Ala hpawtde jang sa wa sanu”.
Ala:
“Hpa n tsang ra ai yaw, Ahkawn. Ahkawn a majaw mung laika hpang hkrat ai lam n byin na matu, shakut na gaw Ala a lit she rai sai. Ahkawn chyu Ala hpe tsawra nga mung n mai ai. Ala mung Ahkawn hpe tsawra ra ai. Laban bat mi sha’aw Ala lu hkan shachyut la ai --- Ahkawn hpa hkum tsang u yaw”.
Ahkawn:
“Shing’a jang mung Ala hpe tsawra ai Ahkawn, Ala a ga hpe n’dang (ningdang) kau n lu nngai. Ala myit ra ai hku rai u ga”.
Ala:
“Ahkawn daram tsawm htap ai Wunpawng shayi hpe gadai wa hpan da ai kun i? Ahkawn an lahkawng ya na zawn grai tsawra mat wa sai lam’aw Wa Karai galaw ai lam ni she rai ang sam sai. Ahkawn hpe Ala lani hte lani grau tsawra mat wa sai”.
Htoi san Shata jan chyawm gaw, bum tsaw ntsa na lap matsun nnan bai prut pru wa ra ai ninghkri ni a lapran hku, katsi bungli woi; man htu htummun doi; rai gumtawng pru wa let si mani tsawmhtap ai Ahkawn a hkumhkrang ting hta Shi a shingkang pre rai jahkra ya nga ai gaw, Ala langai mi sha yu sin-yaw mada; gawngmawn labau ka; da sai n rai ni! O..! N mai prai ai sama; Ahkawn hpe ngai tsawra; Shagawng shana dai; ngwipyaw simsa ai mangai; ten ladaw ni galai shai; prat tup malap n lu nga na sai...i!
