Ala:
“Kanau Bawk! Daina de na, palawng ahkyeng kaw white slending line lawm, labu ahkyeng bu rai nang hte shaga nga ai gadai numsha ta? Ya shi’aw (shi gaw) ganang nga ai rai lu ta?"
Kanau Bawk:
“Niba Hkangda ni a nta kaw nga ai re; shi’aw tsawm ai hte shabung nna grai myit su ai nga yawng tsun jahta ma ai; shi Jinghpaw ga chyawm’aw (chyawm gaw) atsawm n chye shaga shi ai da; hpa majaw nga yang, shanhte Waimaw Laban Kahtawng kaw Myen ga hte Lawngaw ga sha law malawng shaga ai majaw re nga tsun ai --- raitim yagaw grai chye shaga wa sai rai lu ai”.
“Hey! Nu yan Bawk, lawan galaw dat mu re lu; ya manaw manang makyin jinghku nkau mi pi du magang nga ma’sai (nga ma sai)”, nga Kanu shaga ai nsen na dat ai hte rau shan nau bungli bai matut shajin galaw mat wa manu ai. Manaw manang makyin jinghku ni du hkum sai hte maren Family Harvest Festival hpe hpang wa masai. Dai aten, kahpu Awng Hkam gaw dawdap e kanau kaji ni hpe shala makrai chyai let nga nga ai. Party hpang wa sai hte maren, du taw nga ai manaw manang nnan ni hpe mung Kanu hte Kanau Bawk Hkawn yan hku nna shakyen (shachyen) shaga ya nga ma ai. Dai ten, shan nau ni kaw na loi kaba ai’aw Kahpu Awng Hkam hta lai nna Naw Awn hte Ala yan rai nga ma ai. Ala yan ’hpu (Kahpu) Bawk gaw, numsha ni hte shaga gaya ai majaw kahpu Ba Awng nga ai dawdap de yen lung mat wa ma’sai.
“Hpu Bawk hte hpu Doi, nan langai mi sha pi shatdap de wa dung mu. Manang ni mung nanhte hte shaga mayu ai da. Manang ni, hpaji chye wa nna gumrawng gumtawng re ai nga tsun hkrum na mara ai” --- nga kanau Bawk shaga ai nsen na dat ai hte rau:
Kahpu Bawk:
“Nga kam yang nga mu ga le, gaya ai baw n re!”.
Ala a myit hta O! Kanau tsun ai mung jaw nga ai; gaya n mai sai ngu sawn la let npan dap de yu wa nu ai.
Ja Seng Pan
“Ala dung ga..dung ga; anhte hpe n kaw shaga ai she shadu mat sai; hpaji chye tim nau’aw hkum gumrawng mat mu lu yaw”.
Ahkawn
“ E..lu...grau myit su ai baw she re.”
Ala:
“Hpaji chye nna gumrawng ai hku chyawm gaw, n myit la ga i. Anhte chye ai hpaji gaw, masha ni a man hta gaya kahpa she naw re; Hkri ma mung nau she chye tsun sai”.
Kanau Bawk:
“Dai daram wa’aw n rai na ma ai, Nuba e; n kaw shaga ai mung ganang rai na, htaw hpu Bawk’aw kaya nna ya pi ’rai (garai) n yu wa nga lu ai --- ndai’aw hpu Doi re; shi’aw No. 2 lahta tsang jawng kaw tsang 10 sharin nga ai re”.
Ahkawn:
“O! Shing’ga (shingnga ) jang’ung tsa Doi’aw --- O! tsa she rai sai law, garahku shaga ai baw rai kun”? Ning Bawk hte’aw grai hkau sai; shi hpe ngai “kaning” ngu shaga nngai”.
Kanu:
“Ja Seng Pan, nanhte gaw Htingbu mung rai, numsha ma law, anhte gaw la law re majaw, nang hte gaw n shakyen ra sana re; ya kasha galai hkat na hku pi Nnu hpe bawng yu ga” --- Kanu shala let tsun nga ai. “Hmm...!Labang ni hpe’aw moi kaw nna, anhte Kaji, Kawoi ni ngu shaga hkrat wa ga ai; kadwi kawoi ni ngu shaga kat mu yaw”.
Ahkawn:
“Ngai’aw asak naw kaji tim, nanhte a Kawoi ni she ang sai i”? --- Shala let tsun dat ai ga.
Kanu:
“Shing’ga jang'ung Bawk shaga ai hku hkan nna Kanu, Karat ni ngu shaga hkat yang mung n shut na re”.
Ahkawn:
“ E law! dai chyawm she ngu dat yu mu --- nga she mayu sa”! --- Hi..hi..hi!
Kanu hte kanau Bawk Hkawn yan gaw, du taw nga ai manang nnan ni hpe langai hpang langai shakyen ya taw nga ma ai.
Kanu:
“Gai...gai...gai, ngachyu, hpalap lu ga; muk hte nbaw shat ni mung grai naw nga ai”.
Ngachyu, hpalap lu ga;
Muk hte nbaw shat mung grai naw nga ai.
Tsun jahta chyai let party mung ngut wa sai. Du sa ai manaw manang, makyin jinghku ni mung tinang a dum nta de yupra bawhkum machyu na matu chyeju dum, shakram ga tsun, pru wa magang nga masai.