|
Marit Seng Ja Pan
Tutnawng myit kraw kata n wai
la let,
Dum shingran nga ai Apan hpangde,
Ndai maisau ntsa na Pilanla hte,
Datkasa Maisau yan Nau hpe,
Gu a hkum gawngmalai,
Dat dat lu nngai...yaw.
Apan tsawra dik ai Agu mung, Karai Kasang a chyeju a majaw,
Ngwipyaw hkam kaja awngdang nga nngai zawn,
Apan mung hkam kaja let tutnawng awngdang ningngai,
Kabu Olaw nga na ndai
Ngu Gu kam nngai...yaw.
"Tsaw Pan", hkying ten ladaw, shaning, shata,
ninghtoi ni let mali galai shai mat wa ai raitim, Apan the
rau nga n lu ai Gu a prat kammaka gaw, hkringsa shara n mu
ai, dai Pyilanla zawn, zaibru jang ntsa hkan mung pyen gawai,
laidi hkawm nga nngai...yaw, Gu a Apan.
Htaw...shagawng bumtsaw ntsa na lap run Ninghkri hta shi
hkrai dung let marit maroi garen nga ai Pukdun u shingtai
gaw, Gu a sinkraw hta hkra la ai zawn, marit sumri hpe mung
grau sharen ya nga ai le yaw....Gu garahku dina taw!
"Gu tsaw ai Apan",
Marit shingran hpe sha,
Daini anhte Wunpawng ramma ni n mai hkamsha;
Wunpawnag mungdan rawt kalu kaba lam hpe she machyu,
Lamshawng kaja shalat ga lu;
Ya prat, htawmhpang prat,
Ningbaw ningla anhte shalat;
Hpaji lam ni hpe law law hkaja,
Mungkan madang dep ai hku anhte ngapra,
Dai gaw Wunpawng'sha ni a rawtjat lam nan rai nga.
Jiwoi, Jiwa ni a sali wunli,
Daini anhte hkangzing makawp sumli;
Htunghking, laili laika hpe sharawt,
Myu'sha yawng a npawt,
Jahten sharun hpyen mahkra hpe gawt;
Htunghking, laili laika mat yang,
Wunpawng'sha yawng nsin kata de shang,
Htat ai nsin kaba e dang;
Wunpawng myu'sha yawng matwa,
Mungdan n nga,
Shingbyi shara mung gata,
Mungkan ntsa sa pra ai hpa lachyum rai ta?
|
Manudan, sut,
nhprang rai myu hkum,
Dusat dumyeng yawng mung ahkum alum;
Ntsa malen u ni pyen pyaw chyai shara,
Shanhte yawng a lusha hpan lawlaw mung hkum nga,
Dai shara hta ngwipyaw myitdik dum let mahkawn shaga;
Hkashi hkawam ni mung gyigaw let,
Tsittsawm bumlang lagaw garet,
Katsi bungli shi tut htet;
Santsawm ai hkashi hkawam ni a sinkraw,
Dai prip prip Nga kasha ni mung pyau pyaw;
Katsi pyaw nshung, ginhtawng bai gayin du,
Saiwan bungshi ni Da sing ai hpe grup grup yin yin hta tut mu;
Lap run ninghkri ni mung wamwam samwi ni a lapran,
Langji U mung shi hkrai pyen gawan;
Grup grup yin yin nipsani,
Tsawmdik ai Wunpawng shayi,
Nang maigan du sai i…
"Apan", Nang maigan mungdan yawng hpe hproi,
Shagawng Gu Brang ngai nang hpe chyu la wundoi,
Gu hkrai garen let marit maroi;
"Apan", Nang Gu the n hkrum mat yang,
Gu a Datkasa yan Nang nga shara du hkannang,
Apan a tsawmhtap tsaw myit daini du Gu a manang,
Maigan la ni gashun la na Gu grai tsang nngai,...Apan.
"Apan", Gu a sinshang,
Yuptung hpuwa e mung Gu dumhprang;
Apan n lawm ai Gu a Dinghta gaw,
Tsittsawm lali tim hpungkraw;
Apan a tsaw myit Sumsaw hpe,
Dai maigan la ni bai gare;
Apan langai a majaw,
Wunpawng'sha yawng myit n pyaw;
O! Gu tsawdik ai Apan nang,
Dai lam ni hpe koi gam yang;
Yawng gaw Apan langai a majaw kabu,
Hpaji chye ai shayi langai byin pru,
Wunpawng'sha ni yawng mung arawng lu.
Anhte a pyaw...
La ai tsttsawm buga de,
Apan hpaji chye jang she,
Tengsha bai wa yaw,
....Gu tsawdik ai Apan.
|
